في الحقيقه شخصيه هيثم دبور شخصيه اول ما طلعت كانت بتعبر عن الشباب الروش طحن الكول الفافي اللى مالوش دعوة بحاجه ابدا غير الروشنه والموضه والكلام اللى مالوش معنى وطلع في مسلسل تامر وشوقيه"ايه ده هوه انا بعمله سيره ذاتيه ولا ايه" المهم طبعا كلكم عارفينه
بس انا بصراحه معجبنيش ابدا في الفيلم لاستخدامه الفاظ خارجه جدا بدعوة انها روشنه او مادام مش بيقولها بالعربي خلاص تبقى كويسه وبرضه مش كل شخصيه هتظهر في مسلسل او في فيلم او واحد عابر سبيل بيمشى بطريقه عجيبه قدام الكاميرا قدام الممثل هنجيبه ونقوله يمشيها تانى ونعمله فيلم يفضل البطل فيه ماشي مشيته العجيبه ونقول اصله كاراكتر
انا مابقولش ان دمه مش خفيف بس عمر ما كانت البذاءه كانت الحل عشان نعمل حاجه تضحك...مش كده ولا ايه؟
هناك 6 تعليقات:
أنا مقدرش أحكم لني ماشفتش الفيلم فعلا
اولا كل واحد ليه حقوق
زي ماهو من حقه يقول اللي يحبه
انتي من حقك كمان موش تدخلي الفيلم
خصوصا انك عارفه اللي جواه يعني و كدا
سلام عليكي يا مشمشة
هيييييه بوست جديد اخيرا:))))
لالالا مش كل سنتين بوست بلاش تقل علينا
نتكلم جد بقي
....
شخصية هيثم دبور فعلا كانت مميزة جدا في مسلسل تامر و شوقيه لانها كانت غريبة جدا
و لان الاعلام للاسف عندنا تجارة بدات لشخصية في الظهور في الاعلانات بتاعة اتصالات
الاول كانت اعلانات لذيذة بس مع التكرار ظهرت سخافة الفكرة
واستغربت اوي لما لاقيت بوسترات الفيلم و قلت يمكن مجرد اعلان لمسلسل زي بتاع تامر و شوقيه بس فيلم ؟؟؟؟؟no way :)
الغريب كانت الصدمة لما شفت الاعلان ...ايه الكلام اللي اتقال فيه ده ؟؟
اولا صدمة
ثانيا صدمة
ثالثا اسف علي حاله التفكير المتردية اللي بيوصلها الاعلام لمجرد انه يسوق ماده اعلانية و افلام كل الهدف منها الربح
بس عندك حق من كم الكلمات الغير مناسبة ابدااااااااااااااااا اللي اتقالت في الاعلان
بصراحة اتكسفت اتفرج علي الفيلم برغم ان نفس الممثل عمل دور يقال انه يحسب لله في فيلم "ليله البيبي دول " بس برضه مشفتش الفيلم و مقدرش احكم علي دوره و ادائه فيه
بس فعلا مش مبرر لاستخدام الكم ده من الكلمات الخارجة واللي هيكون من اسهل جدا لي الناس ترديدها بدعوي انها اساس الشخصية ال
"coooool"
ربنا يستر
...............
:) فرحانه جدا بالبوست جديد
متغبيش علينا اوي كده
سلام يا مشمشة
مها
اولا احب اشكر كل اللى شرف مدونتى المتواضعه بس الحقيقه ماشوفتش اى فرحه بالرجوع ولا بقى انا غيابى مكانش ملاحظ؟
يلا معلش ارد بقى عليكو يا حلوين
اولا اسراء
سعيده جدا بتشريفك ليا
بس انا مش بقولك تحكمى على الفيلم حتى من الاعلانات اللى انتى كنتى بتشوفيها
ثانيا الاخ الغلبان اللى له لسان
كل واحد له حقوق انا معترضتش بس انا بقول ان الحقوق بتبقى في حدود الادب وانا من حقي ادخل اى فيلم واستمتع زي بقيه الناس ومن حقي برضه ودنى متتجرحش باى لفظ خارج وكانى واقفه بتفرج على خناقه اتنين بلطجيه وبسمعهم بيشتموا بعض
الحريه موجوده والحقوق موجوده بس اكيد ليها حقوق والا مكناش هاجمنا الناس اللى بتسب الرسول والدين وكنا نقول عليهم كل واحد حر
مش كده ولا ايه
سعيده بتشريفك
ثالثا مها
انتى دلوقتى بتتكلمى بلسانى يا مها وده اللى انا عايزة اقوله وانا مش بهاجم حد والله بس وضع مش عاجبنى وبشوف هل انا اللى مش عاجبنى لوحدى ولا فيه لسه ناس عاقلين؟!
سلامى ليكي يا قمر
صباح الفل
غريبة كمية العقل الفظيعة اللي بقيتي فيها لما سافرت..طب مقلتيش ليه كنت اسافر من بدري؟
المهم ان عندك حق..وليكي حق تهاجمي ده رايك..الكلام اللي اتقال كان كلام بذئ جدا يعلم ربنا الرقابة وافقت عليه اذاي ..يمكن بدعوي الكوووووووووووووووووول والكلام اللذيذ طحن..بس مش لدرجة كلام ميصحش انه يتقال اصلا علي وسائل الاعلام
جميل يا مشمشة
ملحوظة:خصوصا انك عارفه اللي جواه يعني و كدا
دي كلمة الاخ دكستر ومعجبتنيش..ياريت لو حيقول راي يحترم البني الدم اللي بيقوله الراي ده وبلاش كلام ملوش لزمة من تحت لتحت..يمكن مش قصده ويمكن قصده بس انا مش ححطك ولا ححط نفسي في احتمالات وانتي عارفه اللي يلمح بكلمة انا اقطعله رقبته يا مشمشة
ملحوظة تانية:شيلي كلمة التاكيد اللي بتتحط قبل الساين ان في الكومنت..قلتهالك في مدونتتك اللي فاتت وبقولهالك تاني..ابوس ايدك ياشيخة شيليها
يلا سلام
هو الحمدلله انا مشفتش الفيلم
عموما كفايه الاعلان
و مش هو بس على فكرة
لا فى موجه حاجات بالمنظر دى طالعه
افلام و اغانى بقى و مسلسلات
:D
عموما كل سنه و انت طيب ..
إرسال تعليق