طيب يا صبر طيب

زمان وكان يا ماكان

كان الزمان انسان

زمان وكان يا ماكان

كان الزمان انسان

دلوقتى ليه يازمان

مابقيتش زي زمان

طيب يا صبر طيب
يرحم زمان وليالي زمان

والناس يامتهنى يا فرحان

الدنيا كانت ورده وشمعه ولسه مخترعوش احزان

زمان زمان وليالي زمان

ساعات الف ازف عرايس وساعات ادور مع نور عرسان
وياما كان بيجيلي مزاج السوع العزال كرباج

ولما اقول شي الزفه تمشي ولما اقول هس كله سمع هس

ودقي يا مزيكا
صدقنى يا صاحبنى كان الزمان صاحبى

ايام ماكان انسان

طيب يا صبر طيب
صدقنى يا صاحبنى صدقنى

طول عمري كان ولا شيء يلحقنى

دلوقتى قال حته مرشيدس تسبقنى وتعفر على دقنى

اه يا زمن العبر سوق الحلاوة جبر

احنا اللى كنا حبايب بيسافروا بينا القمر

بقينا انتيكه

دنيا مزيكا

والدنيا فبريكه

بتفرم الانسان

قصدي اللى كان انسان

طيب يا صبر طيب

ليه...ليه...لييييييييييييييه؟؟؟

طبعا انا غايبه بقالى كتيييييييييييير اوى وانا عارفه بس والله بتابع مدونات كتيره اوى اوى والسبب انى شايفه حاجات المجتمع بيصر عليها او بمعنى اصح حاجات نص المجتمع بيصر والنص التانى لا..طيب ويبقى اسمه مجتمع ازاى ؟؟ اللى اعرفه ان المجتمع يعنى ناس بتجتمع على حاجات واحده يعنى في العادات والتقاليد والاخلاق,بس اللى بيحصل دلوقتى معتش ينفع اللى احنا عايشين فيه ده يبقى اسمه مجتمع خالص عشان كده العنوان بتاع البوست ده مناسب اوى للموضوع اللى انا عايزة اتكلم فيه

(ليييييييييييييييييييييه)
- ليه نص المجتمع بيتفق انه لازم شرط للجواز يكون العريس شهاده عاليه لو العروسه شهاده عاليه والنص التانى مش فارقه معاه؟

-ليه نص المجتمع بيتفق انه لابد من وجود الشقه والنص التانى برضه مش فارقه معاه؟

-ليه نص المجتمع بيتفق انه لازم يكون العريس زمته خالصه يعنى مكانش متجوز ولا مطلق حتى لو معندوش اولاد والنص التانى برضه مش فارقه معاه؟
-ليه نص المجتمع بيوافق على انه عادى ان الواحده تتجوز حتى لو كانت متجوزة قبل كده من واحد مكانش متجوز خالص والنص التانى بيرفض ده؟

-ليه نص المجتمع بيرفض حتى الارتباط بواحده كانت مخطوبه قبل كده والنص التانى مش فارقه معاه؟

-ليه نص المجتمع بيتفق على وجود القايمه والنص التانى لا؟

-ليه نص المجتمع بيتفق على وجود مؤخر صداق كبير وقايمه حلوة كده مكلبظه والنص التانى بررضه مش فارقه معاه؟

-ليه نص المجتمع بيتفق على انه لابد من تطويل الخطوبه عشان العروسين يعرفوا يتفاهموا والنص التانى لا؟

-ليه نص المجتمع بيتفق على انه البنت ملهاش غير بيتها وعيالها وبيرفض شغلها والنص التانى بيقول لا اهم حاجه الشغل الاول وبعدين الجوز والعيال جنب الشغل؟

-ليه نص المجتمع بيوافق على اقامه بنتهم في شقه حماتها او حتى في شقه جنب حماتها والنص التانى بيعرتض بشده؟

-ليه نص المجتمع بيوافق على ان لازم العريس يكون له وظيفته الثابته(مع استحاله ذلك طبعا)والنص التانى بيقول اى شغلانه والسلام؟

-ليه نص المجتمع بيوافق على انه مش مشكله بيشتغل ايه المهم الشقه والنص التانى بيقول لا المهم بيشتغل ايه ومش مشكله الشقه؟

-ليه نص المجتمع بيوافق على لازم يكون الفرق بين الولد والبنت صغير والنص التانى مش فارقه معاه؟

-ليه نص المجتمع بيرفض ان البنت تكون اكبر من الود والنص التانى لا؟

ويبقى السؤال مين فيهم صح ومين فيهم غلط؟

ومين الضحيه في كل ده؟

واحنا نمشي على اى نهج منهم؟

وعقبال عندكم جميعا وابقوا قابلونى لو اتجوزتوا